مقدمة لابد منها !!

عزيزي القارئ هذه أول تدوينة لي في مدونتي المتواضعة "ضحكة مجروحة"وهذا أول إسم خطر ببالي عندما فكرت في عمل المدونة.

عزيزي" المجني عليك " قارئ هذه المدونة لا أعرف ما الذي دفعك لهذه الفعلة الحمقاء وهى قراءة هذه السطور!!؟ التي من المؤكد أنها ستمتلئ بأشياء ستنكد عليك عشتك وإنت أصلاً مش ناقص نكد ده إنت يا حبة عيني غلبان وطالع عينك ليل نهار.

ولكن بما إن ربنا قدرلك إنك تفتح الكمبيوتر وتبقى الوصلة بتاعت النت شغالة عندك "وأكيد ده من حظي الحلو"، فأقسم بالله العظيم بأني سوف أبذل قصارى جهدي للعكننة عليك وأن أحاول ساعياً على حرق دمك بأكبر قدر ممكن والله ولي التوفيق ، وهذا القسم مفروض على أي مسئول يمسك منصب هام عند " أمي" بعد إذنك دماغك ماتروحش بعيد" فمصر هى أمي ولا إيه"؟؟

آآآه قبل ما أنسى لابد من استغلال حنيتك المعهودة وقلبك الطيب وإنك تعذرني على أي تقصير أو إستظراف هتلاقيه في هذه المدونة إشمعنى بتستحمل تقصير وإستظراف المسئولين من أكبرهم لأصغرهم وهنيجي عليا أنا ومش هتستحملني ولا عشان أنا مش تبع "الحزب الوطني"

معلش طولت عليكم في( المقدمة) لأني بجد مش لاقي حاجة أكتبها لك دلوقتي ياريت تفوت عليا بكرة هتلاقيني مجهز لك موضوع يفقع مرارتك بعون الله وبعدين تروح مسافر على ألمانيا تعمل عملية المرارة هناك في مستشفى " أم الألمانيين "وقبل ما ترجع هتلاقيني ألفت لك أغنية بمناسبة رجوعك بالسلامة إلى أرض الوطن (طبعاً إنت فاهم قصدي كويس).

لك مني تحية" إعجاب وتقدير" ليس لأنك قرأت مدونتي ولكن لأنك مصري وقادر تستحمل اللي بيحصل فيك ده كله!!

أخيراً رجاء واحد منك أن تشاركني برأيك الصريح (وإن خفت ما تقولشي وإن قلت ما تخافشي) ، وأن تكون من زبائن هذه المدونة.